Botere politikoaren ondorioetako bat omen da agintari politikoaren psikologian eragiten duen transformazioa. Boterea bere eskuetan izateak agintariaren «ego»a handiarazi egiten du, arrazoi osoaren jabedun bihurtuz eta propioak ez diren iritziei buruz ezkortasuna sortuz. «L’état c’est moi» zioen errege absolutuaren jarrerak ez dira historiako liburuetan bakarrik aztergai, gaur egungo agintari politiko espainiarren azterketa objektiboa eginez gero, bestelako jarrerarik topatzea zaila egiten baita. PPkoek, Aznar jaun eta jabe dutela, politika egiteko modurik antidemokratikoena egikaritzen dute egunez egun, beraien erabakiak justifikatzearren baliagarriak gerta litezkeen arrazoiak topatu eta goitik behera espainiar herri osoari sinetsaraztea alegia. Zuzenbidezko estatu batek politikaren eskuetan uzten dituen tresna betearazleak, legegileak eta judizialak erabiltzen dira hedabideen behar hainbateko laguntzarekin, erabat kontrakoa den iritzi publikoa aldatzea lortu arte. Halere, Espainian, legebiltzarreko gehiengoak ematen die antza zilegitasun demokratikoa, izan Estatu Batuen morroi lotsagarri izateko, izan independentismoaren zati bat legez kanpo uzteko, izan itsasoa belztu duen ezjakintasun politikoa ezinbesteko erabaki ausart eta beharrezko bihurtzeko.

Benetako erregimen demokratiko baten ezaugarriei buruzko debatea sakonegia da lerro hauetan pisuzko argudioak eman ahal izateko, eta ados egongo naiz irakurle askorekin gaur egungo Europan adibide oso gutxi daudela benetako demokrazia batez ari bagara. Halere, helburu maximalista horri uko eginda, ezinbesteko baldintzez aritu gintezke herri batek duen garapen demokratikoa aztertu ahal izateko. Oinarrizko ezaugarri horiei erreparatuta, ukaezina da Erresuma Batuaren garapen demokratikoa Espainiak duenarekin alderaezina dela. Ipar Irlandako arazoan sartu gabe ere, ez dira gutxi azkenaldian ikusgai izan ditugun adibideak: alderdi propioaren oposizioa agerian utziko duten legebiltzarreko debateak eta gobernuko kide diren ministroen dimisioak ekarriko dituen erabaki politikoen debate publikoa besteak beste. Berrehun baino gehiago dira Londreseko legebiltzarrean Blair-en iritziaren aurka dauden bere alderdiko kideak, eta hiru baino gehiago dimisioa jada aurkeztu dioten ministroak. Horrekin alderatu Aznar-en jarrera ezkutatzailea eta inposatzailea. Ingalaterran erantzukizun politikoaren ondoriotzat jotzen da laborista batek Blair-en aurkako bozka egitea, Espainian, aldiz, alderdiaren ahultasunaren eredutzat. Fenomeno beraren bi azterketa desberdin horiek ez al dira kontzepzio demokratiko kontrajarrien ondorio?

Ez nuke Blair defendatu nahi, baina inbidi puntu bat sentitzen dut Ingalaterrako debateak ikusita. Urte asko pasatu beharko dira oraindik Madrilen antzekorik ikusteko

Gaia: Euskal Herria

Egilea: Martin Aranburu

Komunikabidea: Gara

Gazte Abertzaleak erakundeak bere 15. urtemuga ospatuko du Martxoaren azken asteburuan, Tolosan eginen den ekitaldi handiaren bidez. Zutabe huntan holako ekitaldi baten egitaraua emaitea bitxia izan badaiteke ere, ekitaldiaren egitarau original bezain bikainak, hilabete huntan gai hau aipatzea erabaki nau.

Bai, jadanik 15 urte Gazte Abertzaleak erakundea existitzen dela! Horrek jende asko harrituko du. Neri harrigarria iduritzen zaidana da, 15 urteren ondoren, Gazte Abertzaleak-ek, lehen egunean bezain azkarki jarduten duela, injustizia guzien kontra (salbuespenik gabe) eta Euskal Herri eta mundu hobe baten alde. Iduriz gure gizartea eta gazteria geroz eta konformista eta inaktiboagoa bilakatzen ari delarik, idealismoa eta utopiari atxikirik segitzen dugu Gazte Abertzaleak-ekoek, amets horiek egi bihurtuko diren esperantza tinkoarekin.

15 udaberri hauen ospakizuna, hiru ataletan eginen da:

“Trantsizio Aireak”: Ostiralean, arratsaldeko 7ak eta erditan, Carlos Garaikoetxeak “Marko Politiko berri baten beharra” izenburupean hitzaldi bat emanen du Tolosako Kultur Etxean. Gaueko 10ak eta erdietan, nostalgia aire goxo bat jinen zaigu askori, Leidor Antzokian izanen den kontzertuarekin: Manex Pagola, Urko, Gorka Knörr, Aitor Badiola, Jocou Gaxton eta Amaia Zubiria! Eta azken orduko sorpresa bat beharba!

“Alternatiba Eraikiz”: Larunbatean, Usabal Sagardotegian izanen den Bazkari Herrikoia aitzin, estaturik gabeko herrien banderez osaturiko Alkartasun Ikurriñaren igoera eta agurra eginen da. Atsaldean, desobedentzialari bati (edo batzuei), lehen Joseba Elosegi oroigarria emanen zaio, bertsolarien aireek akonpañaturik.

“Utopiari Eutsi”: Igandean, Mendi Martxa goiztiar baten ondoren, Andoni Iturzaeta eta Begoña Erraztiren eskutik, Gazte Abertzaleak-en “Elkarbizitzarako bake proposamena” aurkeztuko da.

Asteburuan zehar, karrika animazio, jokoak, herri kirolak, bertsolariak, txalaparta, erakusketak, txosnak,…

Ekitaldi paregabe huntan parte hartu nahiz gero, badakizue zer egin: Martxoak 28, 29 eta 30ean, denak Tolosara!

Gaia: Euskal Herria

Egilea: Haritza Camblong

Komunikabidea: Le Journal du Pays Basque

Sorgintxulo, Santutxu auzoko gaztetxea, itxi nahian dabiltza. Adineko pertsonentzako zentro bat eraiki nahi dute neurrigabeko inbertsio bat eginez. Tokia, gainera, ez da horretarako aproposena, Txurdinagako parketik hurbilago egotea ere posible izango litzateke eta. Horregatik Sorgintxulon auzoko zenbait gaztek egindako lan guztia bertan behera botatzea bidegabekeria handia iruditzen zait. Autogestio eta okupazio adibide positiboa da hau nire iritziz. Bilboko Gazte Abertzaleak taldeko ordezkari batzuk gaztetxean izan ginen orain dela hilabete batzuk, hura goitik behera ezagutzen, eta auzoko gazteentzako lokal oso egokia iruditu zitzaigun. Sekula ez genuen espero horren ondo antolatuta egongo zenik. Han egindako lan itzela ikusita harrituta gelditu ginen. Gainera ez dio inori inolako arazorik sortzen. Gaztetxe hau ixteko erabakia hartu duten horiek Sorgintxulora bisitan joango balira iritziz aldatuko lukete.

Gaia: Euskal Herria

Egilea: Ibon Usandizaga

Komunikabidea: Gara

Gazte Abertzaleaken 15. urteurrenaren Jaia Tolosan.

Ekitaldi honi buruz informazio gehiago honako helbide honetan lor dezakezue:

www.gazteabertzaleak.org/urteurrena

Gaia: Jardunaldiak

Nahiko tristea da Emakume langilearen nazioarteko eguna, Gay eta Lesbianen eguna etab.koak ospatzea, horrek esaten baitigu oraindik gaur ezberdintasun egoera batean bizi garela, hoberena holako egunak ez ospatzea izango litzateke herri honetan berdintasuna eta alkartasuna nagusitu egin direlako, bazterketa eta irainen aurrean.

Egun ezberdintasun egoerak ikusten ditugu gizartean, emakumeok oraindik ez dugu berdintasuna lortu gizonezkoekin alderatuz. Emakumeon egoera beste hamarkadekin erkatuta aldatu egin dela onartu beharrean gaude baina aldaketak nahikoak ez dira izan. Oraindik ere egoera tamalgarriak pairatzen ditugu, hala nola:

1. Hilero 1200 emakume tratu txarrak sufritu dituztela salatzen dute %80 a beraien senarren erasoengaitik, kontuan hartu behar dira ere salatzen EZ direnak.
2. Etxeko laboretan, 6 miloitik gora emakume daude ordaintzen ez zaien etxeko lanetan.
3. Gazteen arteko langabezian emakume langabetuen kopuruak gizonena ia bikoiztu egiten du.
4. Lanean ari diren %40 a inguru ekonomi murgilduan ari da.
5. Emakumeen haurdunaldia libreki etetea (Aborto librea) erabakitzeko eskubidea ukatua dago.
6. Bortxaz erahildako emakumeen kopurua gero eta handiagoa da.
7. Eraso fisiko zein psikologikoak.
8. Heziketa, hizkera eta iragarki sexistak.
9. Emakumeen batazbesteko soldata, gizonezkoena baino %30 a baino baxuagoa da.
10. Bortxaketa eta sexu abusuak.

Gazte Abertzaleak-etik giza eskubide guztien defentsan iharduten garenez, emakumeen eskubideak aldarrikatzen ditugu berdintasun egoera lortzeko, eraiki nahi dugun Euskal Herria askatasunean eta berdintasunean oinarrituko baita.

Gaia: Justizia soziala

Egilea: Estitxu Iturrate

Komunikabidea: Deia

Euskal Herriko gatazka Irlandakoarekin parekatzeko joera dugu, han ematen diren baldintza politikoak hemen ezagutzen ditugunekin antzekotasun handiak zituztelakoan. Aldekotasun horren zuzentasuna debatitzeko asmoa ez darabilkit buruan gaurkoan, baizik eta bestelako hausnarketa bat, Euskal Herrian gerta litekeen balkanizazioa alegia.

Finean Euskal Herriko arazo politikoa nortasun arazo bat baita. Nortasun politiko arazo bat. Norbere burua espainiartzat eta frantziartzat jotzen dutenak egon badaude, baina era berean ukaezina da norbere burua soilik euskalduntzat jotzen dugunak ere egon bagaudela. Gerta liteke nazio kontzeptzio batzuek beren estatu propioa izatea, eta era berean gerta liteke beste batzuk propioak ez diren beste nortasun politiko batzuetan murgildurik geratzea. Errealitate honekin, estatuek nahitaez egin beharreko hautu bat dute pare-parean: estatuarekin bat datorren nortasun politikoa ukatu ala onartu.

Errespetu kasuan formula anitz daude nortasun politiko desberdinek elkarri errespetua frogatu diezaioten, beti ere baldintza sinple batetan oinarrituz: desberdinaren errespetua eta desberdinaren erabakitze ahalmenaren onarpena gauza bera dira. Hortik abiatuta, komunitate politiko desberdindu batek erabaki asko har ditzake: Estatuan txertatzea federalismoan, konfederalismoan, autonomian, zentralismoan edo estatu berezitasunean oinarrituz, edo estatutik at proiektu propioari ekitea. Edozein aukera da posible, baina denek dute abiapuntu bera: nortasun politiko desberdinduen onarpen.

Ukazioa da beste aukera. Hau da, herri batek bere estatuan nortasun politiko bakarra egoteari irmo eustea. Hau arazo larria izan ohi da estatuentzat askotan: ukatua sentitzen den komunitatea errekonozimenduaren aldeko norgehiagoka politikoak abiaraztea. Norgehiagoka horiek batzuetan militar itxura ere hartu dute, eta kasu zailenetan borroka militar hutsean transformatu dira. Balkanetan, azaldutako hiru aukeretatik azkena nagusitu zen. Serbiarrak, kroaziarrak eta bosniarrak bestearen nazio identitate sentimen- duari muzin eginez komunitate arteko gatazka militar odoltsuak abiarazi zituzten. Eta nire ustez guk kontuan hartu beharrekoa ez da gerraren eta garbiketa etnikoaren konstatazio objektiboa, baizik eta militarismoaren nagusitasuna suposatu zuen dinamika militaristazale itsua. Beste komunitatearen eskubi- deen ukazioa, komunitate desberdinen arteko distantziak gutxitu baino erakartzen dituen hedabideen jarrera, jarrera polizial eta militarzaleen pixkanakako nagusitasuna eta justifikazio publikoa… honen guztiaren berri izan zuten Balkanetan, eta honen guztiaren berri izaten hasiak gara hemen. Baikortasunak eta ezkortasunak alde batera utzita, merezi du honen gainean apur bat pentsatzea.

Gaia: Euskal Herria

Egilea: Martin Aranburu

Komunikabidea: Gara

Bloque Nacionalista Galego, Esquerra Republicana de Catalunya, Chunta Aragonesista eta Partit Socialista de Mallorca-Entesa Nacionalista aldierdien gazte taldeek, Gazte Abertzaleei bere alkartasun osoa adierazi nahi dute, Egunkaria-k jaso duen erasoa dela eta.

Adierazpen askatasunaren aurkako eraso bortitz honen aurrean, gazte talde hauek demokrazian oinarrizkoak diren baloreak kolokan jarri direla salatu nahi dute.

Era berean atxilotuen askatasuna eskatzen dute, eta salatu izan diren tratu txarrak eta tortura kasuak, lehen bailen ikertzea exijitzen dute.

Gaia: Euskal Herria

Egilea: Medio/Komunikabidea

Komunikabidea: Prentsa Oharra/Nota de prensa

Donostia txiki gelditu zen bertan inoiz izandako manifestaldirik handienean

Andoni Iturzaeta (GA): “Berriro ere, faszistak mozorrorik gabe dabiltza Euskalherrian”

Euskal Herri osotik etorritako jende oldea bildu zen Donostian Kontseiluak antolatutako manifestaldian. Aniztasuna nagusi bazen ere, erakunde politiko eta sozial ezberdinetakoak elkartu ziren euskal kultura eta adierazpen askatasunaren aldeko ekitaldi honetan. Bizigay askapen sexualaren aldeko gazte erakundeko kideekin hitz egin genuen manifestaldia hasi eta hamar minutu beranduago beren autobusa oraindik Zarautz aldean zegoela Donostiara heldu ezinik, trafikoak errepidea itota baitzuen. Gazte Abertzaleaken izenean, Andoni Iturzaetak adierazi zuen agerian gelditu dela zein den justizia españolaren jokabidea, “inongo oinarri legalik gabe eta beti, españolista totalitarioen mesedeetara”. Hainbat alditan ‘demokrazia’ hitza erabiltzen duten horiek erakusten ari dira berdin zaiela oinarrizko eskubideak zapaltzea. ‘Kulturari, euskerari, abertzaleoi, berdintasunari, justiziari, demokraziari eta adierazpen askatasunari eraso zuzena da gaurkoa. Berriro ere, faszistak mozorrorik gabe dabiltza Euskalherrian’ dio Iturzaetak.

Martin Aranburu Gako kidea eta parlamentariaren esan du, “Euskal Herriaren aurkako erasoa salatzea etorri gara, eta era berean Euskal Herri euskalduna aldarrikatzera”. Aranburuk ez zuen Aznarren aurkako iritizirik gorde, eta gogor gaitzetsi zuen bere estrategia.

Bestetik Begoña Errazti bera ere izan da manifestaldian, eta Ikastolen aldeko hitzak ere izan ditu. Zuzenki jo zuen PPren aurka bere estrategia antieuskalduna salatuz.

Hona hemen han gertatutakoa isladatzen duten argazki batzuk, handitzeko sakatu beraien gainean:

Egunkariko langileek beren lankide atxilotuen askatsuna eskatzen	Kontxa Pasealekuan, Perlatik ateratako argazkia. Eguzkia laino euritsuetatik agertzen hasia da. San Martin kaletik ezin da jende guztia sartu, eta puntu horretatik aurrera manifestazioak kale paraleloak okupatzen ditu (Zubieta kalea eta Kontxa Pasealekua)
Milaka lagun manifestatu zen Egunkaria altxatuz EGUNKARIA AU-RRE-RA oihukatzen zutela	Xabier Mendiguren, Kontseiluako bozeramailea Egunkariako ale bat eskutan duela, manifestazioaren buruko pankarta eusten du. Alboan Egunkariako zuzendaritzako hainbat kide ditu.
Bolondres ugari izan zen Egunkariaren aldeko dirulaguntza eske eta Egunero egunkariaren harpidedun izateko eskakizun orriak banatuz.	Manifestazio burua Antiguan zegoen oraindik, hots tunelaren beste aldean, eta agerian den jende olde horren zehar igaro behar zuen. Jende gehiena ez zuen biderik izan manifestaldiaren abiapuntura heltzeko, Donostia leporaino baitzegoen.
Jende askok jarri zuen bere kotxeetan euskararen aldeko propaganda	Onintza Lasa eta Andoni Iturzaeta manifestapenan	Begoña Errazti, Anjeles Iztueta eta Joseba Azkarraga manifestaldian
Martin Aranburu ere bertan izan zen	Manifestaldiaren burua, Artzai Onaren albotik.
Manifestazioaren burua estuturik dagoen jendetzaren artetik bidea egiten ari dela Mirakontxaren parean. Tunelaren gaineko lorategiak jendez gainezka ageri dira, baita irudiaren ezker aldean Mirakontxako Lorategien gainean den paseoa ere

Gaia: Politika orokorra