Sorgintxulo Gaztetxeak 4 urte daramatza Santutxuko auzoan lan egiten autogestio eta auzo bileretan. Ikastaroak eta kultur ekimenak antolatzeaz gain, oinarrian, gazteek beren ekintzak aurrera eramateko toki bat eskeintzen du Sortintxulok, kalea eta tabernekiko alternatiba bat sortuz. Santutxuko gazte batzuek Karmelo eliza ondoko eraikinean sartu zirenetik, bizitza eman diote urteetan hutsak egon diren lokal hauei.

Gazte talde horri, eta azken lau urteetan egitasmora gehitu zaizkien beste gazte batzuei esker, gaur egun Sorgintxulok auzoko liburutegi eta zinematoki bakarra du. Liburutegia, eta bildu ahal izan den liburu aukera zabala, bizilagun guztientzat eskuragarri dago, bai irakurketarako zein ikasteko. Bestalde, zinematokian igandero filme bat ikusi daiteke, bai gazteleraz zein euskaraz. Gainera, ludoteka, erakusketa gela, informatika gela, eta musika gela ditu.

Azken lau urteetan, antolatzaileen gaztetasun, bizitasun, eta ordutegien aldakortasunari esker, Txurdinagako gizarte etxearen ahalmenetatik kanpo dauden ekintzak egin dira. Hitzaldiak, mahai borobilak, ikastaroak (txalaparta, linux…), kontzertuak, lehiaketak, txangoak, kale piztura ekimenak, haurrentzako jokoak, antzerkia, eta abar luze bat antolatu da. Honela, auzoaren azpiegitura publiko eskasiari aurre egin ahal izan zaio.

Baina Bilboko Udalak Sorgintxuloren itxiera suposatuko lukeen egitasmo bat du esku artean. Alzheimer gaitza dutenentzako Eguneko Zentru bat eraiki nahi da gaur egun Gaztetxea dagoen tokian. Helburu honetarako egokiena ez den toki bat. 24 plazatako ahalmena izango duela jakinik, Udalaren egitasmo honek gehiegizkotzat jo daitekeen inbertsio bat dakar. Santutxun bizi diren 11.500 zaharretatik 24 bakarrik hartu ahal izango ditu bertan, eta 1.550.000 euroetako aurrekontuaz hitzegiten ari dira (260 milioi pezeta zaharretan).
400 erabiltzaile baino gehiagok ezingo dute, gainera, autogestioan oinarritutako egitasmo honetaz gozatu.

Hau dela eta, Bilboko Gazte Abertzaleak, maiatzaren 16an 22:00tan Karmelo Plazatik Sorgintxulo Gaztetxearen azken urteetako lana goraipatuz aterako den manifestazioan parte hartzeko egin den deiaren alde agertzen da.

Gaia: Justizia soziala

Egilea: Gazte Abertzaleak

Komunikabidea: Prentsa Oharra/Nota de prensa

Askatasun eta kulturaren aurkako eraso zuzen baten aurrean, EAko gazteriak beharrezkoa jotzen du gizarte erantzuna.

Gazte Abertzaleak-ek “Kontseiluak” bihar Donostian ospatuko duen manifestaziora joateko bere jarraitzaileak mobilizatuko ditu. Aldi berean, euskal gazteariari manifestazioari masiboki erantzuteko deia egiten dio, eta Euskal Herrian, espainiar Estatua egiten ari den zentsura eta askatasunen etengabeko murrizketa ez dugula onartzen erakusteko.

EAko gazteriaren aburuz, manifestazio horretan oinarrizko askatasunekin, adierazpen askatasuna edo bizitzeko norbere kultura eta hizkuntza aukeratzeko askatasuna esaterako, ados dagoen edonork du tokia. Behin betirako, Estatuak zer argitaratzen zen eta zein hizkuntzetan erabakitzen zuen garaia atzean utzi nahi duen edonork du tokia, ziur jendetsua izango den manifestazio honetan.

Aldi berean, atxilotu, langile, eta orokorrean irakurleekin elkartasuna adieraziz manifestatzeko beharra azpimarratzen du erakunde abertzale aurrerakoiak.

Azkenik, Gazte Abertzaleaken iritziz, “Oinarri juridiko gabe, aski da terrorismoa gure herriko izaera eta kultur adierazpideekin nahasteari; saiatu ziren, emaitzik gabe, AEKrekin, eta orain, berriro saiatuz, euskara kriminalizatu nahi dute, herri eskaerak errealitate bihurtzen dituztenak atxilotuz”.

Gaia: Euskal Herria

Egilea: Gazte Abertzaleak

Komunikabidea: Prentsa Oharra/Nota de prensa

Croisés de Saint-Andrés taldeak 90 urte ospatuko ditu larunbatean zortzi. Futbolean luzaz aritu naiz talde hortan eta urtemuga hunen kari antolaturiko ekitaldia dela eta, oroitzapen anitz jin zaizkit gogora.

Orroitzen naiz nola Angeluko Oihana ikastolan nintzela, Croisés-an ari ziren ikaskide batzuk talde horretara sartzea konbentzitu gintuzten. Hasieratik biziki ongi integratu ginen eta hamabost urte baino gehiagoz, hor, futbolean jostatuz, gure haurtzaro osoa Croisés-an pasa dugu askok. Ikastolako anitzentzat, gure lehen kontaktua zen euskaraz mintzatzen ez ziren haurrekin. Ikastolakoak ez ziren haurrek, oso ongi onartu gintuzten eta ikastolakoak ginelako gurekiko errespetu handia zutela erranen nuke. Haientzat, ikastolakoentzat bezala, gure arteko harremana oso aberasgarria izan zen.

Bestalde, pentsa daiteken bezala, anekdota politak bizi izan ginituen; errealeko jokalariekin eginiko bazkarian, lehen txapelketetan edo autobusean egiten ginituen bidaietan erraite baterako. Orroitzen naiz nola behin, Baionako Cherubinots-en kontra aritu ginen, jendarmeen zelaian, eta Txomin Iturbe bere semeen ikustera joanik, jendarmeekin batera ikusle izan zen han. Beste kirolekin pasatzen den bezala, futbolarekin ere, ezinezkoak iduritzen diren gauza batzuk pasa daitezke.

Berantago, pittin bat handitzean, partiduetako bi denborez gain hirugarren denborak egiten hasi ginen. Egiazki bikainak! Duela gutti, Suitzan tesia egiten ari den nere anaiak, hango bere futbol talde berriari buruz hau erraiten zidan:”Untsa jostatzen gira bainan ez da talde girorik”. Hortxe ohartu nintzen Croisés-an ginenak abantailatuak ginela zentzu hortan.

Beraz milesker Croisés-an lanean ibili diren bolondres guzieri eta beste 90 urtez hola segi dezatela!

Croisés-a talde eredugarria da, bainan dituen ezaugarriez gain, beste ezaugarri bat izanen lukeen taldeak falta dira Iparraldean: haurrak euskaraz mintzatuz jostatzen eta entrenatzen ahalko liratekeen talde bat. Uda Leku, Ikas-Pilota eta Hendaiako herriak antolaturiko ekintzetaz aparte, eskolatik kanpo euskarazko aktibitateak egiteko aukerak biziki urriak dira. Noiz sortuko dugu bere funtzionamenduan euskara erabiliko duen haurren lehen futbol taldea?

Gaia: Euskal Herria

Egilea: Haritza Camblong

Komunikabidea: Le Journal du Pays Basque

Hauteskundeak ditugu berriz ere Hegoaldean. Gu guztion eguneroko bizimoduan eragina duten hainbat kuestioren kudeaketa noren esku utzi behar dugun erabakitzeko garaian, sistema politiko-demokratiko normalizatu batez arituko bagina, ezkerraren eta eskuinaren arteko lehia programatiko-ideologikoa litzateke gakoa. Horrez gain, emantzipazio nazionalaren prozesuan dagoen nazio bateko biztanleek, ezker-eskuin dialektikatik at, Euskal Herria edo Espainiairen arabera ere egiten dute beren hautu politikoa. Hau izan da orain arte euskaldunok ezagutu dugun normalkuntza demokratiko anormala.

Oraingoan, ordea, egoera zailagoa da, izan ere, herri honetako milaka biztanleren proiektua ordezkatzen duen ideologietako bat legez kanpo utzi baita, eta ondorioz hauteskundeetara aurkezteko aukera leku oso urritan izango du. AuBz eta herri anitzetan sortu diren plataformez ari naiz.

Batasunaren ilegalizazioaren azalpena emateko, asko izan dira Estatuko ordezkarien estrategia politikoaren argudioa erabili dutenak; Batasuna legez kanpo uztea oinarri juridikorik gabeko erabaki politikoa zela, eta ondorioz, helburu politiko baten lorpenerako ekiten ziotela PPk eta PSOEk ilegalizazioari. Helburu politiko argi bat zen estatalismoaren partetik, Euskal Herriko erakundeen osaketa eraldatzea abertzaletasunak duen ordezkaritza politikoa gutxiaraziz, eta, ondorioz, estatalismoarena areagotuz. Euskal Herriko alderdi politikoek izan duten jarreraren inguruko kritika asko egin daitezke, batzuk zentzuzkoak izango direlarik, beste asko, ordea, ez. Halere, zalantzan jarri ezinezko hiru gauza daude: ilegalizatzailea nor izan den, ilegalizatuak nortzuk izan diren eta ilegalizazioaren arrazoiak zeintzuk izan diren.

Zilegi da ilegalizatua izan den aukera politikoak, estrategia politikotzat norbere botuen aldeko aldarrikapena egitea eta ilegalizatzaileen borondatearen aurkako hautu onena ilegalizatutako alderdiaren aldeko boza ematea dela esatea. Baina era berean, zilegi da, udaletxe eta batzarretako ordezkarien banaketa egiteko garaian botu baliagarriak bakarrik kontuan hartzen direla jakinda, estatalismoaren aurkako hautu onena erakundeetan PPren eta PSOEren aurka arituko diren indar politikoen aldeko hautua egitea dela pentsatzea. Euskaldun askok pentsatuko dute frankistei amorru izugarri emango liekela ilegalizatutako indarren aldeko botu kopuru handia, baina euskaldun askok pentsatzen dugu bestelako zerbaitek emango diela benetako amorrua: hauteskundeak galdu eta gehiengo abertzaleak osatzea berriz ere ahal den erakunde kopuru handienean. Bi aukerak badira zilegizkoak, utzi diezaiogun bakoitzari norbere kontzientziaren arabera ekitea eta hautu pertsonala egitea. Presiorik gabe, mehatxurik gabe eta errepresiorik gabe.

Gaia: Euskal Herria

Egilea: Martin Aranburu

Komunikabidea: Gara

Segi, EGI, Hatsa… zein da berezitasuna Gazte Abertzaleak erakundean? Zeintzuk dira haren helburuak?

Bai, esan bezala, ez dira gazte mugimenduak eskasak Euskal Herrian! Alde batetik, mugimendu desberdinen ugaritze hau interesgarria da, desberdintasuna bermatzen duen heinean. Hala ere, beste ikuspuntu desberdin batetik, mugimenduen kopuru honek esparru abertzalean dugun arazoetako bat uzten du agerian: funtzionamendu ez koordinatua. Zuk izendatutako taldeen artean, badaude desberdintasun nabariak (aurrerago komentatzeko aukera izango da), baina talde hauen errebindikazio nagusiak Iparraldeko gazteriaren gehiengo ez abertzaleak dituenekin alderatzen baditugu, bistan geratzen da gazte abertzaleen talde desberdin hauen ideiak parekoak direla. Aniztasun honen arrazoietako bat mugimendua hauetako batzuek alderdi politiko bati lotura izatea da. Iparraldean lau alderdi politiko abertzale desberdin izatea harrigarria da neurri berean, baina pixka bat ulergarriagoa da Iparraldearen historiari begira, bere osotasunean eta gaur egungo egoera sozio-politikoan. Hemen eztabaida luze bat dago, eta hemen aztertu egin dezakegu. Mintza gaitezen zehatz-mehatz zuk izendatutako gazte talde hauetaz.

Gazte Abertzaleak EA alderdiaren gazteriaren ordezkatzen du. Hala ere, bere kideak ez dira, berez, EAko kideak izan behar. Mugimendu hau Euskal Herri osoan du ordezkaririk eta bi helburu ditu, orokorki: euskal herriaren burujabetasuna eta lurraldetasuna eta elkartasun gizarte baten eraketa. Bere burua ezkerreko mugimendu abertzale bezala definitzen du. Helburu desberdin hauek lor daitezen, gure proposamena indarkeriarik gabeko ekintzei ekitea da; horien artean, desobedientzia zibila. Edozein bidegabekeriaren aurka gaude, eta horrexegatik, ekintza bidegabe guztiak gaitzesten ditugu, indarkeria ekintzak, beraien artean. www.gazteabertzaleak.org (frantsesez ere azkar izango dugu) web orrialdean Gazte Abertzaleak dituen berezitasun eta helburuei buruzko azalpen ugari ematen dira.

Segi Batasunaren gazteria ordezkatzen du. Gazteria mugituagoa eta militanteagoa da, eta badira, zentzu honetan, jarraitzeko eredua. Hala ere, gu ez gaude ados beraiek indarkeriaren inguruan mantendutako jarrerarekin, ez eta batzutan Euskal Herriko gazteriari buruz mantendutako jarrera hegemonikoarekin.

EGI PNBren gazteria da, eta nire uste apalez, gu baino gutxiago garatu dira Iparraldean oraindik. Ez da ezkerreko mugimendu bat, Gazte Abertzaleak bezala. Nire ikuspuntutik, Gazte Abertzaleak hobeto ordezkatzen du gazteria mugituagoa eta militanteagoa.

Hatsa mugimendua eratu berria da. Hatsaren eraketa baino hilabete batzuk lehenago, Gazte Abertzaleak ekintza batzuk antolatzen hasi zen, Iparraldean bere presentzia indartu nahian. Beranduxeago, AB publikoki adierazi zuen gazteen talde bat eratzeko zuen borondatea. Hatsaren eratua izan aurretik, ABko gazteak Gazte Abertzaleak erakundeko kideekin bilduak ziren, ekintzarik burutzerik balego elkarlanean ikusi nahian. Hain zuzen, ideia berdinak dauzkagu, beraz, zergatik ez sortu Iparraldean gazteen alde berri bat! ABko gazteek alderdi politikoetatik independenteagoa eta irekiagoa izango zen mugimendua sortu nahi zuten. Gazte Abertzaleak prest zegoen bere ateak irekitzeko, baina EArekin dugun lotura kontutan harturik, ezin izan dugu azkenean mugimendu berri honetan parte hartu. EArekiko banaketa osoa eta gure izenaren aldaketa kontraesan handiak ziren guretzako. Hatsa hilabete batzuk beranduago jaio zen, bere burua Iparraldeko mugimendu independente, ezker abertzale eta ez bortitz bezala aurkezturik. Orain Hatsa ABren gazteriatzat jotzen da. Alderdi politikoetatik independentzia izatearen beraien helburua ez da, beraz, bertan mantendu. Dena den, bere sorkuntza arrakastatsua izan dela uste dut. Gazte Abertzaleak erakundearekin dituzten desberdintasunei dagokienez, nire ustez, desberdintasun nagusia Gazte Abertzaleak Euskal Herria osoan (nahiz eta Iparraldean ahula izan)duen presentzian datza, Hatsa Iparraldean baino ez dagoen bitartean. Suposatzen dut Euskal Herri osora zabaltzeko asmoa izango dutela (haien helburuetako bat dela uste dut). Hauxe funtsezkoa iruditzen zait zazpi lurralde historiko dituen Euskal Herri baten aintzat hartzea eskatzen duen gazte talde batean. Hatsarekiko beste desberdintasun nabari bat ere badago (eta nire ustez, EGIrekiko ere): errebindikazio ekintzaz burutzen ditugun neurri berean, hausnarketa politiko sakonak ere egiten ditugu, txostenen idazketaz. Hau gure kideen adin helduagoaren azalpena izan daiteke, agian (30 urte gutxi dira politikan). Baina desberdintasun guztien gainetik, nire ustez GA eta Hatsa oso hurbil daude bata bestearengandik eta elkarrekin lan egiteko aukera izango dute, eta zergatik ez, etorkizunean mugimendu zabalagoa sortzeko aukera ere.

Ze nolako balantzea egiten duzue azken 15 urteotaz?

Proiektu berri baten sorkuntzak eragindako ilusioaren ostean, gaur egun GA Euskal Herriko gizarte eragileen artean dago, gure proiektuan lan egin duten ehundaka militanteri esker. Gaur egun, GA 400tik gora militante ditu, ia Euskal Herri txoko guztietan dago sarturik, bere Biltzarretan ponentzia batzuk berresten dira, barne funtzionamenduaz, politikaz, gai sozial eta kulturalaz, ingurugiroaz, hezkuntzaz, euskaraz… zeinek bere kideen ideologia bideratzen duten, EAren ideologian eta zeiharki Euskal Herriko instituzio batzuetan eragin zuzena ere dutelarik.

GA intsumisio mugimenduan hartu du parte, euskal selekzioaren aldeko mugimenduan ere, eta era berean, Euskararen aldeko mugimendu askotan. Gaur egun desobedientzia zibileko ekintzak antolatzen ditugu, urtero gure laguntza eskaintzen diegu bai Nafarroa Oinez, bai Ibilaldia, bai Araba Euskaraz, bai Kilometroak ekitaldien antolatzaileei, globalizazioaren aurka munduan zehar antolatutako bilkuretan parte hartu dugu, estaturik gabe nazio gehienetako gazte mugimenduekin kontaktuan gaude, globalizazioaren (edo amerikanizazioaren ) eraginak azaltzeko eta elkartasuna globalizatzeko kanpaina burutu dugu, bidegabekeria salatzeko manifestaldi gehienetan egon gara (Irakeko gerra, Egunkariaren itxiera…)… eta behinik behin festak antolatu! Hurrengo asteburua bezalaxe, Tolosan. Hona hemen azken 15 urteotako adibide batzuk (www.gazteabertzaleak.org orrialdean gehiago ikus daitezke).

Gazte Abertzaleak Iparraldean daukan presentzia nahiko ahula, ia ez dago. Ba al duzue garapen proiekturik?

Alabaina, gure presentzia nahiko ahula da eta gure garapena nahiko zaila izango da seguruenez, Hatsaren jaiotzaz geroztik. Nire ustez, gazteak ez dira asko matxinatzen gaur egun, eta matxinatzen direnak guk baino irudi erradikalagoa duten taldeetan murgiltzen dira. Horrela, zaila izango da garatzea, hala ere, badaude proiektu batzuk. Joan den urtean, Iparralde eta Hegoaldeko gazteen arteko futbol partidua antolatu genuen, elkar ezagutu zezaten. Bi aldeetako gazteen arteko loturak sortzen saiatuko gara; hauxe oso garrantzitsutzat jotzen dugu egunen batean Euskal Herria batua ikusi nahi badugu. Joan den urtean ere, auzolandegi bat prestatu genuen, Kanboko Xalbador ikastolan. Urte honetan, ekintza hau berrestea gustatuko litzaiguke, Seaskarekin. Gure laguntza Herri Urrats ekitaldiaren antolatzaileei eskaintzeko asmoa dugu. Munduaren amerikanizazioaren aurkako kanpaina aurkeztu nahiko genuke Iparraldean. Bestalde, orain ireki berria izan den Elkartetxean erreserbaturik dugun aretoan, ekintza desberdinak periodikoki antolatzeko nahia dugu bereziki, Pannecau kalean 47, Baionan. Gure web orrialdea www.gazteabertzaleak.org frantsesera itzultzea nahiko genuke. Ez dira gutxi burutzeko ditugu ideiak! Gurekin kontaktatu nahiko lukeen edozeinek bidal dezake e-maila bat iparralde@gazteabertzaleak.org helbideari, Pannecau kaleko elkartetxetik pasatu, edo 0559255098 telefonora deitu.

Gaia: Euskal Herria

Egilea: Haritza Camblong

Komunikabidea: Le Journal du Pays Basque

Eusko Alkartasunako Batzar Nazionalak, Biltzarren artean alderdiak duen erabaki organo gorenak, Batzorde Nazionalaren proposamena ontzat hartu du gaurkoan, kontrako boto bakar bat egon delarik. Proposamen honi jarraiki, Harkaitz Millánek, Gazte Abertzaleak-eko Nazioarteko Harremanetarako arduraduna, PNV-EA koalizioak Donostiko alkatetzarako aurkeztutako zerrendan bigarren lekua izango du.

Europa Press-ek jakin zuenez, Gorka Knörr, alderdiko idazkari orokorraren hitzetan, Harkaitz Millán 23 urteko donostiarra da, Historian lizentziatua eta alderdi mailan lan asko egin du urteetan zehar.

Hautaketa honekin, bukatutzat jotzen da Euskal Herriko hiriburu eta Batzar Orokorretako hautagaien izendapen prozesua. Knörr-en hitzetan, “estatutuetako prozesua lurralde guztietan bete ahal izatea gustatuko litzaigukeen.”

Donostian ageri geratu zen akordio faltaren aurrean, Hiri Batzarrak eta Batzorde Nazionalak proposatutako hautagaien artean, Garantietako Batzorde Eragileak azkenengo honek izen bat proposatzea ebatzi zuen, zeina Batzar Nazionalak onartu egin duen. Gorka Knörr-ek jakinarazi zuenez, “izendapen hau alderdiko afiliatu guztiek onartua izan behar da”.

Gaia: Euskal Herria

Egilea: Medio/Komunikabidea

Komunikabidea: Europa Press

Izatezko bikoteen legeari buruz honako hau adierazi nahi dugu:

- Eusko Legebiltzarrak izatezko bikoteen legea onartzeak pozten gaitu. Modu honetan urrats garrantzitsua eman izan da izatezko bikoteen kolektiboak, sexu berekoak bereziki, pairatzen zuten bazterketa juridikoa nahiz legala ezabatzeko. Hala ere, oraindik ere gutxiegi deritzogu, urrunago iritsi zitekeelako. Etorkizunean berreskuratu beharko genukeen gutxieneko akordioa
delakoan gaude.

- Gure poza ere azaldu nahi dugu legebiltzarrean eman den alderdien arteko elkarrizketa giroagatik (PP izan ezik) eta kontsentsuagatik, herri honetako beste hainbat arazo konpontzeko benetan erabilgarria zein beharrezkoa dena.

- “Bizigay”tik ez dugu ulertzen Jaurlaritzako alderdi baten eskaera isilpeko bozkaketa egiteko, eta emandakin batzuk bananduta, adopzioa jorratzen duen 8 artikulua kasu. Gai hauek isilpean eta tabuekin jorratzea ez zaigu bidezkoa iruditzen batez ere, demokrazia sendotzeko horren beharrezkoak diren eskubideen berdintasunaz ari garenean. Ez ditugu ulertzen modu honetan bozkatzea sustatu duten lotsa pertsonalak.

-Partidu Popularraren lotsagabekeria ere salatu nahi dugu, ” konpetentzien alorrean” oinarrituz denon ardura diren giza arazoetan ez dutelako sakontzen, eurek bultzatutako norbanakoen zein giza eskubideen atzerakadarekin bat etorriz.

Berriz ere, “Bizigay”tik, aldarrikatu nahi dugu euskal gizartearen ardura diren gai honetan nahiz beste batzuetan erabateko konpetentziak izatearen premia, “Popularren” zapalkuntza absolutistaren menpe ez egoteko.

Gaia: Giza eskubideak

Egilea: Bizigay

Komunikabidea: Prentsa Oharra/Nota de prensa

Mila zortziehun eta laurogeita sei. Estatu Batuetako Chicago hirian zortzi orduko lanaldiaren aldeko aldarrikapenak konbokatu zituzten ezkerreko hainbat taldek. Ordenuaren aurkako ekitaldia zela argudiatuz, poliziak manifestazioa erreprimitu zuen, sei anarkista atxilotu eta jarraian epaitu. Garai horretako gainegitura kapitalistentzat epaiek erakusgarriak izan behar zutenez, etorkizunean gerta zitezkeen konbokatoria berriak ezereztatzeko sei anarkistak heriotza zigorrera zigortu zituzten. Anarkistak hiltzea lortu zuten, ez, ordea, langileen eskubideen aldeko borroka ezereztatzea.

Urte asko pasatu dira data horretatik. Hainbeste urtetan askotarikoak izan dira langileen, eta orokorki, sistema kapitalistagatik zapalduak izan diren munduko biztanleen borroka eta aldarrikapen dinamikak: iraultzak, askapen mugimenduak, estatu sozialistak, grebak, gudak eta abar luze bat. Eta urte horietan guztietan, gaurko eguna barne, Chicagon gertatutakoa gogoratzen dugu, bertan erreprimitutakoen eta eraildakoen omenez, beraien aldarrikapenak jarraikortasuna izan dutela, dutela eta izango dutela munduari gogoraraziz.

Ezin dut ukatu ezkerraren egoera txarra denik. Marxismoak suposatu duen oinarri teorikoak berriztapen bat behar du, XXI. mendeko kontzientzientzat alternatiba analitiko baliagarri bat eskaini ahal izateko, eta beronen ondorioz, berriz ere botere alternatiba bat izan dadin sistema honen eraldaketa prozesua sakonduz. Egoerak egoera, helburuak alde batera utzi gabe, maiatzaren bata ezkertiarren bilgunea da, eta egun horretan, alderdien eta sindikatuen deiari jarraituz edo norberaren kontzientziaren deiari jarraituz, Euskal Herriko kaleetan izan behar dugu ezkerra bizirik dagoela aldarrikatuz, sistema kapitalista honen bidegabekeriak salatuz eta beste mundu bidezkoago bat lortu nahi dutenen kontzientzien alienazioa gertatu ez dela frogatuz. Gaurko eguna ez dagokio soilik langileei, orokorrean alternatiba batetan sinesten dugunoi baino. Neoliberalismoa nagusi bada ere, lehenengo munduan konformismoa jaun eta jabe bada ere, bigarren eta hirugarren munduan itxaropena liberalismoan jartzen bada ere, ezkerrak bizirik dirau eta bere unearen zain jarraitzen du, urtero-urtero maiatzaren batean frogatzen dugun legez.

Artikulua bukatu nahi dut gaurko egunaz mintzatzen den Italiako abesti komunista zahar bat gogoratuz. Honela dio:

Un giorno per chi vive del lavoro,

un giorno per chi crede nel futuro,

un giorno per chi lotta con coraggio,

il nostro giorno il primo maggio!

Lanetik bizi direnentzako eguna, etorkizunean sinesten dutenentzako eguna, kemenez borrokatzen direnen eguna, maiatzaren bata gure eguna!

Gaia: Justizia soziala

Egilea: Martin Aranburu

Komunikabidea: Gara