Manifestua:
2004ko ekainaren 28ko adierazpena.
Bilbo

Gaur ekainaren hogeita zortzia da eta gaur, plaza honetan, gure orientazioagatik, gure desioengatik edo gure jardueragatik baztertuta gauden guztiok bat egin nahi izan dugu. Gaur, gure garrasiak bildu nahi izan ditugu aniztasunezko ortzadar bat sortzeko. Gaur, elkarrekin, gure ikusgarritasunaren pankarta hartu dugu gizarte berri eta aske baten eraikuntzaren alde.

Askotarikoak gara eta aniztasunean agertzen gara. Ez dago isiltasuna inposatzeko arrazoirik, ezta ere, beldurra edo gezurra justifikatuko duenik ere. Gure bizimodua arau estuei lotzea, gure eskubideak lasaitasunaren truke merke saltzea eta gure desio sotilak aurreiritziz mozorrotzea mesprezatzen dugula aldarrikatu nahi dugu.

Gure ikurrek ilunpean dagoena argitara ekarri nahi dute, itzalpeko eta ilunpeko oro argitara atera. Gizarte hipokrita honek bere baitan dagoena ezkutatu nahi du, bere burua zuri, seronegatibo, patriarkal, kapitalista, heterosexista eta konbentzional bezala azaldu. Baina gu ez gaude maskarada hori onartzeko prest.

Gure ikurrak hemen bildutakoak bezain askotariko dira. Aho biko aizkora bikoitzak, hiruki arrosak eta beltzak, hartzen oinatzak,… Ez gara soilik lesbianak, gayak, transexualak eta bisexualak, beste gauza asko ere bagara: emakume feministak, txaperoak eta prostitutak, agiririk gabeko etorkinak, HIESak jotakoak, familia homoparentalak, eskubide osodun internazionalistak, ezinduak, larruzaleak, ilezaleak, lodizaleak,… laburbilduz, askatasuntzale eta plazertzaleak.

Gure begiak, urtero bezala gaurkoan ere, hurkoa kalean, ohean, tabernan naiz kale-kantoian errespetatzearen aldeko defentsa sutsu eta gordinaren isla izango dira. Urtero bezala Stonewall Inn-en gure askatasunaren sua piztu zela ospatuko dugu, barrutik daramagun sua askatu zuen sua. Baina arranguratuta gogoratuko dugu, oraindik ere, torturaren eta heriotzaren hatzaparretan harrapatuta jarraitzen duten gizonak eta emakumeak ere badaudela; beraien izate soilagatik, izan direlako eta izaten bizi nahi dutelako; desiratzeagatik eta desiratzen bizi nahi dutelako; sentitzeagatik eta sentitzen bizi nahi dutelako. Gure justizia nahietan zaudete.

Ereserki honekin ikusgarri bihurtu nahi izan dugu begiratze soilarekin ikus daitekeena: alegia, askotarikoak garela, aniztasunean erditzen garela eta geure buruaren mugak gainditzeko prest gaudela. Jakin dezatela denek.

ANITZAK GARA!!!

Gaia: Giza eskubideak

50.000 inguru lagun elkartu ziren atzo Bastidan Araba Euskaraz ospatzeko. GAen hainbat kideak parte harte zuten Arabako ikastoleen festan eta antolatzaileekin lan egin zuten euskara bultzatzeko Arabako Errioxan.

Gaia: Euskal Herria

GA-EK IKASLE EUSKALDUNONTZAT HAIN GARRANTZITSUA DEN LEGEAREKIN AURRERA EGITEA ESKATZEN DU, KANPOTIK ETORRIKO DIREN OZTOPOAK GAINDITUZ

Pasa den otsailaren 25-ean Eusko Legebiltzarrak Euskal Lege Unibertsitarioa, zilegitasunez eta demokratikoki, onartu zuen. Hain polemikoa izan zen prozesuaren ondoren, eta GA-ek ezinbestekoa deritzon lege hau aurrera atera ostean, PSOEk zuzentzen duen Gobernu espainolak trabak besterik ez ditu jarri, Aznarrek azaltzen zituen jarrera berdinak jarraituz.

Zentzu honetan, Gazte Abertzaleak-ek Hezkuntza Sailean legea aurrera ateratzeko lan egin dutenei eskerrak eman nahi dizkie, batez ere Anjeles Iztueta sailburuari honen defentsan jarrera sendoa, tinkoa mantentzeagatik

Aro berria? Jarrera ezberdinak? PSOE-k Gobernuan daraman denboran nahikoa izan du GA-ek berdin jarraitzen dugula ikusteko: gauzak hobera joango zirenaren esperantza zapuztu ditu dagoeneko.

Oso kolektibo garrantzitsu eta anitzaren gainean eragina duen legea atzera botatzeko asmoz, Rodríguez Zapaterok, inkonstituzionaltasun helegitea aurkeztu du zehazten den autonomia unibertsitario eredu eta hartzen dituen konpetentzien aurka. Helegitearen aurkezpenak Legebiltzarraren eginkizunak oztopatu eta legea baliogabetu du; ondorioz, Gasteizko Parlamentuak legeak egiteko duen autonomia zapaldu da.

Horrela, PSOE-k iaz PPk indarrean jarri zuen LOU-ren kontra azaldutako iritzia sinbolikoa izan zela salatzen du GA-ek: manifestaldietako irudietan bakarrik geratu da. Orain, PSOE-ri dagokio LOU-ren kontrako erabakiak hartzea, baina ez dirudi zentzu honetan ezer egingo duenik; eta Aznarren garaitik datozkion jarrerei segituz, Eusko Legebiltzarrak onartutako Lege Unibertsitarioari etengabeko erasoa zuzendu dio.

Gaia: Hezkuntza

Egilea: Gazte Abertzaleak

Komunikabidea: Prentsa Oharra/Nota de prensa

Igaro berri diren hauteskundeak aitzaki, Gazte Abertzaleok hainbat gogoeta adierazi nahi ditugu.
Hauteskunde hauetan, oroar, azpimarratu beharreko elementu garrantzitsuena dudarik gabe europear batasun osoan eman den abstentzio maila itzela izan da. Gure herria era ez da errealitate horretatik aldendu. Parte hartzeak inoiz ez bezelako maila baxua izan du eta horrek gogoeta eta hausnarketa sakonetara bultzatu behar gaitu. Estatu espeinolean, bozka eskubidea dutenen artean %ko 50a aisa gainditu du abstentzioak, hau izanik, tamalez hauteskunde hauetako garailerik nabarmenena.
Nabari geratu da europaren eraikuntzan ez goazela bide egokitik, hori behintzat argi uzten du herritarren jarrerak. Europear prozesuak ez du tamaina horretako erronka historiko batek eskatzen duen erakargarritasun eta interes maila sortzen herritarrengan, eta honek baditu arduradun edo erantzule ezberdinak.
Europa herri eta herritarrengana gerturatu beharrean goi mailako agintarien bulegoetan gelditzen da. Azken hauteskundeak horren adierazle argi bat dira, non alderdi gehienak proiektu amankomun honekiko dituzten ideiak esatera ere ez diren animatu.
Non gelditzen da europear prozesuaren zilegitasun eta legitimitatea, parte hartzea %50etik urrun geratzen diren hauteskunde hauekin?
Bestetik, eta argi utzirik parte hartze ezaren ondorio kezkagarriak, gure herrian eman diren beste bi errealitate adierazi nahi ditugu.
Alde batetik, Estatu espainolak bideratu duen egoera antidemokratikoa herri honetako gizartearen %10 gainditzen duen aukera politiko bat legez kanpo uztean. Nola izan daiteke muga baten aldean legalak izatea eta bestean ez, teorian mugak gainditu behar dituen prozesu europear honetan?
Bestetik, gure gazte erakundeak sostengatzen edo aldarrikatzen duen alderdiaren emaitza onak azpimarratu nahi genituzke. Orain gutxi izandako hauteskundeekin alderatuta Eusko Alkartasunak ia bi puntu igo ditu porzentualki gizartean duen aldarria berretsiz. Gainera autodeterminazio eta justizia soziala defendatzen duten alderdi legalen artean lehentasuna eskuratu du eta hau ere datu guztiz pozgarria da jakinik, gainera ERCrekin tartekatuta gure ahotsa helaraziko dugula Europear erakundeetara.

Iparraldeari dagokionez esan genezake, hauteskunde hauek PS eta Raffarinen arteko liskar bezala planteatu direla eta textuinguru honek ez du gehiegi laguntzen abertzaleon ideien defentsa egiten komunikabideetan. Berdeen listan hirugarren postuan joan da Eusko Alkartasuna, Abertzaleen Batasuna eta PNBren hautagaia den Gorka Torre DEMOa. Berdeek Frantziako estatuan zehar beherakada nabarmena pairatu dute, eta abertzaleon bozak Iparraldean jeitsiera hau orekatu egin du. Gure helburua EAk sustengatutako listan buru zegoen Gerard Onestaren aulkia ateratzea zen eta hori lortu da. Gainera, abertzaleon ideiekin bat egiten duten Berdeekin lan ildo interesgarria hasi da. GA-ko kideok ekologiarekin konpromesu tinkoa daramagu eta bide hau benetan interesgarria deritzogu, gure aberriaren eskubideen defentsarekin bat eginez. Beraz, iparraldeko emaitzen irakurketa ere positiboa da.

Bukatzeko, eskaera bat luzatu nahi diogu Patxi Zabaletari; ez ditzala esan Aznarrek esan zituen hitz antzerakoak espero zituen emaitzak lortzetik urrun Euskal Herritarrak elduak ez zirela adierazi zuenean. Horrek emaitzak onartzen ez jakiteaz gain eldutasun politiko urria baino erakusten ez duelako.

Gaia: Politika orokorra

Egilea: Gazte Abertzaleak

Komunikabidea: Prentsa Oharra/Nota de prensa

Gaztekoek 19:45tan geratu gara Santutxuko Karmelo metro geltokiko sarreran.
Itxaroten zaitugu!

Gaia: Politika orokorra

Festa eta kultura herrikoiaren aldeko manifestuari gure atxikimendua eman diogu; eta hau aldarrikatzeko, larunbatean, Bilbon, topaketa alaia ospatuko da.
Anima zaitez!
Manifestua www.manifestua.org web orrian eskuragai dago .

Gaia: Politika orokorra

Begoña Errazti eta Mikel Irujo GA, JERC eta Chobellana Aragonesistako kideekin bildu ziren atzo

EDURNE BEGIRISTAIN- GASTEIZ
Igande honetan izango diren Europako hauteskundeetan gazteek parte hartzea ezinbestekoa dela esan zuen atzo Eusko Alkartasuneko lehendakari Begoña Erraztik, eta boza ematera joateko eskatu zien: «Garai historikoa da, Europako Batasunean erabakitzen denak eragina duelako gure herrien etorkizunean, eta, beraz, gure gazteengan». EAko presidenteak alderdi horretako hautagai Mikel Irujorekin batera agerraldia eskaini zuen atzo Gasteizko Alkartetxean, EA, ERC eta CHAko gazteekin batzartu ostean.
Erraztiren ustetan, Herrien Europa koaliazioak Katalunia, Aragoi eta Euskal Herriaren arteko loturak sendotzen ditu. Ildo horretan iritzi zion EAk, ERCk eta CHAk ezaugarri komun bat dutela, hots, «ezkerreko alderdiak garela eta gauzak aldatu nahi ditugula». Bere esanetan, herri desberdinak izanagatik, guztiek «errespetua» diete estaturik gabeko nazioei eta herrien elkartasuna bermatzeko lanean jarduten dute.
Erraztik ez ezik, alderdietako gazte erakundeetako ordezkariek ere hitz egin zuten atzoko agerraldian. Hala, Andoni Iturzaeta Gazte Abertzaleetako (GA) idazkari nagusiak argi adierazi zuen zeintzuk diren Europari begira dituzten helburuak: «Europa desberdin baten izar alternatiboa izan nahi dugu». GA, JERC eta Chobellana Aragonesista gazte erakundeek «Europa soziala, herrien Europa eta Europa demokratikoa» eraikitzeko nahia azaldu zuten atzo hitzartutako idazki batean.
Bestalde, Laura Ribalaiga JERCeko kide eta Herrien Europako hautagaiak eta Daniel Ripa Chobenalla Aragonesistako ordezkariak Galeusca hautagaitzaren aurka jo zuten. Ribalaigaren esanetan, CiU alderdiak «eskuin regionalista» ordezkatzen du eta, beraz, ez ditu Kataluniako eskubide nazionalak Europan bermatuko. Bestalde, Ripak «ezkerreko Europa» baten beharra azpimarratu zuen, eta helburu hori «eskuineko alderdiekin» batera lortzea ezinezkoa litzatekeela gaineratu zuen.

Gaia: Internazionala

Egilea: Medio/Komunikabidea

Komunikabidea: Berria

Ekainak 9an, GA, JERC eta Chobenalla Aragonesista erakundeen arteko azkeneko ekitaldi bateratua, eta kanpainan erakunde honen ekitaldi zentrala izango zena ospatu zuten Zangotzako Auzoen Federakundean.
Bertan, Laura Ribalaiga, Europar hauteskunde hauetan JERC-eko hautagaia; Iñaki Sanchez, GA-eko ordezkaria; Fernando Carrasco, Chobenalla Aragonesistaren nazio koordinatzailea eta Miguel Marínez Tomey, CHA-ko Europako Parlamenturako 2. hautagaia egon ziren.
Era berean, Chobenallak “Herrien eta gizarte eskubideen Europagaitik” kanpaina aurkeztu zuen Mas Rasmia aldizkariarekin batera, Europa Batasuneko estatu gabeko nazioen gaineko gehigarri bereziarekin batera. Bertan, Eskozia, Gales, Flandia, Occitania, Britainia, Saboya, Sardeña, Frisia, Tirol, Moravia, Silesia eta andaluzen, katalanen eta euskaldunen arazoak eta egoerak azalduz.
Miguel Martinez Toneyk, aragoneses soilik egindako diskurtsoan, Europan pisurik gabe ez jarraitzearen garantiza azaldu zuen. “Ahotza eduki ez izana, edo inkonpetenteen eskuetan egon izana, Aragoi baino ekonomikoki aurreratuagoak zeuden lurraldeengaitik baztertuta geratu zen” azaldu zuen. CHAren ordezkariaren hitzetan, “gazteek ez dute onartu behar gure herria garatzeko aukerak galtzen uztea”.
Iñaki Sanchez, Galeuskaren inguruan, galdetu zuen “ PNV-k nola ordezkatu dezake gure herria, haien hauteskundeetarako proposamenen artean autodeterminazio eskubidea aipatu ere ez badute egiten. Ez dugu Europan izar bat nahi, alderdi honek esaten duen bezala, ezkerretik eta errespetu demokratikotik eraikitako Euskal Errepublika independiente bat baizik”.
Laura Riblalaigak, katalanez, sozialagoa, ekologikoagoa, demokratikoagoa izango den, eta gazteak eta herriak kontutan hartuko dituen Europa bat eskatu zuen. Era berean, Europa mailan NHP-ren kontra egindako borroka bateratuarekin katalanen eta aragondarren arteko harremana erabat sendotu dela adierazi zuen. Azkenik, Ezkerra eta JERC-en kontra aragoiko egunkari garrantzitsu batetan agertutako berriaren inguruan esan zuen “katalanen eta aragoidarren arteko harremana urratzea bilatu besterik ez duela egiten; bai izan duten historia amankomunean, bai arazoetan eta etorkizunerako proiektuetan elkarrekin doazen herrien arteko harremana urratzeko”.
Fernando Carrascok, Europako Parlamenturako aurkezten diren beste zerrendak komentatu zituen: “Frankok, PP-ak eta Borrellek gauza bat konpartitzen dute: makro ibai-aldaketak egiteko interesa eta nahia. Zein izango da PSOEren jarrera Bruselasen Ebroaren ibai-aldaketaren inguruan? Eta Borrellena?”. “PAR-ari dagokionez, Union Valenciana eta PA bezalako alderdiekin aurkezten dela dio, ibai-aldaketen alde azaltzen diren alderdiekin, alegia”. Bukatzeko adierazi zuen “aukera electoral murritz eta triste hauek ikusita, Aragoirentzat esperantza da geratzen den gauza bakarra; baina, zorionez, esperantza horrek Chunta Aragonesista du izena”.

Gaia: Internazionala

JERC, GA, eta CHOBENALLA ERAKUNDEEK ANIZTASUNAREN ALDE APOSTU EGITEN DUTE.

Atzo, ekainak 8, Gasteizko EA ko egoitzan JERC, Gazte Abertzaleak eta Chobenalla erakundeen arteko topaketa egin zen. Laura Ribalaiga (JERC), Daniel Ripa (Chobenalla) eta Andoni Iturzaetarekin (GA) batera, Begoña Errazti, EAko presidentea, eta Mikel Irujo, Europarako hautagaia egon ziren.
Hogeita hamar lagunen aurrean, guztiek Europa solidario, demokratiko, jasangarri eta errepublikan oinarritzen den baten alde apustu sendoa azaldu zuten; kolore anitzez osatutako Europaren alde, alegia.
Utopiaz ere hitz egin zuten, Euskal Herria, Catalunya eta Aragoi, Europan nazio eta Estatu gabeko herri diren heinean utopiari eutsi behar diotela azaldu zuten. Herri aurrerakoi eta solidarioz osatutako Europa utopikoa bilatzen baitute Herrien Europa koalizioa osatzen duten alderdiek: aniztasuna aintzat hartzea eskatu zuten eta neoliberalismoa eredu duen egituratik urruntzea, errespetuan eta autodeterminazio eskubidean oinarritzen den Europa lortzeko.
Andoni Iturzaetak “geure helduei zer nolako Europa nahi dugun azaltzea da topaketaren helburua” adierazi zuen. GAko idazkari nagusiak zehaztu zuenez “eskakizunak abertzale, ezkertiar, utopiazale eta gazte garen aldetik egin ditugu”, eta hauek “gure herriak besteen maila berean egotea, elkartasunean oinarritutako Europa osatzea, pertsonak kapitalaren gainetik jartzea eta gazteoi aukerak ematea” dira.
Zentzu honetan ere Chobenallako ordezkariaren hitzetan, “abertzaleok Europear sentimendu sakonena dugunak gara, gu guztiak errespetatuko gaituen benetako Europan sinisten dugulako; ez Estatuen mapetan azaltzen diguten horretan, kolorez betetako, aniztasuna oinarri duen Europa Bateratu batetan sinisten baitugu”.

Gaia: Internazionala

JOAN PUIGCERCOS DIPUTATUAK PARTE HARTU DU HIRU ERAKUNDEEN ARTEKO TOPAKETAN.

Europar hauteskundeetara begira JERC, GA eta Chobenalla Aragonesista erakundeek euren lehen ekitaldia ospatu dute gaur bertan Barztelonan. ERCren egoitzan ospatu den prentsaurrekoan, gazteon papera Europan aldarrikatu dute eta “Herrien Europa” Koalizioa ezkertiar eta independentistak diren gazteentzat aukera egokiena dela adierazi dute.

Ekitaldi honetan, Laura Ribalaigaren (ERCren hautagaia) eskutik aurkeztuta, Miguel de Andrés Frias-ek (GA-en ordezkaria) Europa Soziala ezkerretik eraikitzea aldarrikatu du. Bere ustez, Europar Konstituzioak autodeterminazio eskubidea defendatu beharko luke. Prentsa aurreko honetan, De Andrés-ek “Herritarren Zerrenda” legez kanpo uztearen erabakiarekin desadostasun pertsonala adierazi du eta, era berean, Galeusca koalizioaren jarrera salatu du.

Horrez gain, Daniel Ripak ,Chobenallaren ordezkariak, estatu mailan PHNren aurka borrokatu eta gero Aragonek Bruselara begiratzea aukerarik zuzenena dela dio. Riparen ustez, Espainako gobernuak gaur egun Aragonek dituen hainbat eskuduntza berreskuratu nahi ditu Bruselasen aurkituko dituen aukerekin baliatuz. Chobenallako ordezkariaren ustez Europar hauteskundeak garrantzi handia dute Herri honen gaurko egoera baloratzerakoan eta salatzerakoan aragoitik kanko bizi diren aragonesen ikuspuntua azaltzeko balio izango baitute, eta oraingo egoerarekin desadoztasuna azaltzeko aukera paregabea eman diezaiekelako.

Gaia: Internazionala