Gaur goizean GaztEHerria aurkeztu dugu hamarnaka gaztek Ibaetako campusean. Bertan dinamika eta Gazteriaren Adierazpena aurkeztu ditugu. Hain zuzen ere adierazpen hau izango da dinamikaren oinarri politikoa. Horretaz gain apirilaren 2an Durangon burutuko den ekimenean eta Aberri Egunean parte hartzeko deia luzatu diegu gazte guztiei. Hona hemen testua:

Hasteko, eskerrik asko hona hurbildu zareten guztioi.

“Munduan bada bazter bat (ez genuen sortu orduko hautatu) gure herria erizten duguna.” Hala esan zuen Joseba Sarrionandiak Harriak eta Herriak poeman. Eta hain zuzen ere horregatik gaude hemen, Euskal Herriko hamaika txokotatik etorri eta bildu garen hamarnaka gazteok; Euskal Herriak urte luzez jasan duen ukazioarekin amaitu nahi dugulako. Gure herrian aske bizi nahi dugulako.

Herri bat gara. Gazte herri bat gara. Behinola izan genuen herri hartatik harriak baino ez zaizkigu geratzen. Harri zatitua da gure herria. Baina zergatik egingo dugu dramarik? Ez dago ezer galdua. Are gehiago, asko dugu irabazteko! Gazte konprometituak gara eta konpromiso horren erakusle nabarmena da gaur abian jarriko dugun ekimena.

Abagune politiko garrantzitsuan gaude. Euskal Herriko eragile politiko eta sozial ezberdinek Aberri Egunaren testuinguruan indarrak bildu eta independentziaren alde lanean jarduteko konpromiso irmoa hartu dute. Eta gazteok, mugimendu horretan badugu zer esana eta zer egina, noski. Herri honen oraina eta etorkizuna gara, eta beraz guri ere badagokigu independentziaren aldeko uholdean gazte olatu ahalik eta indartsuena sortzea.

Hain zuzen ere horixe da GaztEHerria, independentzia Euskal Herriaren biziraupenerako aukera bakartzat ikusten dugun gazteon bilgunea. “Ez den herrialdearen kartografoak” izango gara, Sarrik zioen eran.

GaztEHerria independentziaren alde lan egin nahi duen gazte ezkertiar ezberdinen topagunea da.

GaztEHerria independentzia tresnatzat hartuz herri honek behar duen aldaketarako gazteon ekarpena da.

GaztEHerria osatzen dugun gazteon artean adostutako Gazteriaren Adierazpena izango da gure oinarri politikoa.

GaztEHerria Aberri Egunaren bezperako egunetan egingo dugun ekimen erraldoian irudikatuko dugun gazte indarra izango da.

Alta, GaztEHerria, adierazpen eta ekimen hauetatik harago, independentziaren aldeko gazte esparru oso bat da.

Esan dugu, dinamika berri honen oinarri politikoak Gazteriaren Adierazpenean bildu ditugula. Manifestu hau azken asteetan gazte eremuko eragile eta norbanakoen artean garatu den elkarlanaren ondorioa da. Hainbat eragile eta norbanako gaztek euren atxikimendua adierazi diote dokumentu honi. Hala ere, aurrerantzean jasotako babesa biderkatzen jarraituko dugu. Honela dio adierazpenak:

GaztEHerria gara.

Eremu, arlo, herri zein auzo ezberdinetako gazteok osatzen dugun Euskal Herriko gazteria gara, Independentzian amestu eta berau elkarlanean eraiki nahi dugun gazteria. Parte hartzea oinarri izango duen gazte mugimendu zabala abian jarriz, soilik gazteon iniziatiban oinarrituriko bidea abiatzera goaz. Etorkizuneko Euskal Herria gara, eta etorkizunak izen bakarra dauka: INDEPENDENTZIA.

Independentzia, herri honentzat aukera bakar bezala ulertzen dugu.

Urte askotan zehar, gure herria askatasunean bizitzeko aukera ukatua izan zaigu, eta horregatik, burujabe izateko aukera bakar bezala ikusten dugu independentzia. Euskal Herria osatzen duten zazpi lurraldeen luze-zabalean, beste eredu bat eraikitzeko tresna bakar moduan ulertzen dugulako, elkarlanean independentziaren bidea marrazteko konpromisoa hartzen dugu.

Gazteon eskubide indibidual eta kolektiboak oinarri, gazteon eskubide zibil eta politikoen errespetua exijitzen dugu.

Independentziaren aldeko lana guztiz zilegi zaigu. Euskal Herriko gazteria osatzen dugunon lana askatasun osoz eramatearekin bat hezurmamituko da herri honen geroa. Eta beraz, banako zein talde bezala dagozkigun eskubideen aitortza zintzoa aldarrikatzen dugu.

Independentziaren aldeko gazte olatua sortzera goaz

Askatasun egarriz gauden belaunaldia gara, eta Independentziaren eskutik etorriko den askatasunean sinesten dugu. Horregatik, bakoitzak bere eremutik, baina elkarlanean, tantaz tanta osatzen joango den gazte olatua sortzera goaz. Independentzian sinesten dugulako, gazteriaren beharrei erantzutera eta gazteriaren mesedetara egongo den mugimendua sortzera goaz, gazteok bide propioa eraikiz, eta berau iniziatibez josiz.

Independentziaren alde, elkarlanean jarraitzeko konpromisoa hartzen dugu

Adierazpen hau oinarri, Euskal Herrian sortuko dugun Independentziaren aldeko olatu horren lehenengo tanta bezala ulertzen dugu, eta horren aldeko konpromisoa erakusten dugu.

GaztEHerriaren lehenengo urratsa

GaztEHerria osatzen dugun gazteok, Adierazpen hau oinarri harturik, Apirilaren 4an ospatuko den Aberri Egun bateratura deialdia egiten dugu. Honekin batera, eta gazte ekarpena eginez, Apirilaren 2an Durangon Independentziaren alde jaialdi erraldoia antolatzera konprometitzen gara.

Dei egiten diogu euskal gazte orori ekimenarekin bat egin eta independentziaren bidean ekarpena egin dezan, independentzia guztion artean eraikiko badugu, gazte ororen lana ezinbestekoa baitzaigu.

Herri hau askatasunera eramango duen belaunaldia gara, independentziari ateak irekiko dizkion gazte uholdea sortuko duen belaunaldia izango gara. Gu gara geroa…

Argibide gehiago: Gazteherria

Milurtetan emakumeak esklaboak izan gara, besteren nahiak jasan ditugu edo eta egoera hoberenetan merkantzia legez salduak izan gara. Historian hain urrun joan gabe, gugandik gertu dauden herrietan adulteriogile izatea leporatuta harrikadak jasotzen ditugu; gugan karga- aberea ikusten duten horiek, gure plazera ezeztatzeko gorputzaren zatiak ebakitzen dizkigute; segundo bakoitzean munduko edozein bazterretan gure adina edota egoerari buruz ezer jakin gabe, bortxatzen gaituzte; eta azkenik, gure gizartean hain normala bilakatzen ari den emakumearen aurkako bortizkeriaren hedapen geldiezina bizitzen ari gara.

Mila urtetako Historian ikuste ezinak eta gaur egungoan ahantziak, geure ahotsak batzen jarraitu behar dugu gure aldarrikapena munduko txoko guztietan entzuna izan dadin, menpekoak, esklaboak eta jazartuak izateari uzteko lagunduko dizkiguten eskubideak lortzen ditugun arte. Gaur elkartu behar gara gure eskubideen alde borrokatzeko, berdintasunarengatik, argi izanik guk martxa hau ez badugu antolatzen, inork ere ez du gugatik egingo.

Datozenak datozela, ondorengo emakume belaunaldiek beste egoera hobeagoa bizi dezaten, emakumeon eskubideen aldarrikapen jarraian eta sutsuan jardun behar dugu eta horrelako egunetan guztiak elkartu gure ahotsa entzun dadin. Bortizkeri matxista jasaten dutenengatik, gizonezkoek determinatutako kulturaren itzaletan bizi behar duten horiengatik, min garrasia barnetik atera ez dezaketenengatik… haiei, gure alkartasuna eta oztopoak oztopo, aurrera jarraitzeko grina helarazi behar diegu, emakumeak gizalegez izan behar dituen eskubideengatik egiten ari garen lana ez baita inoiz ezerezean geldituko eta gure aldarrikapenetan urrats berri bat emateko balioko zaigu beti.

Maider Carrere Souto

Gazte Abertzaleakeko Idazkari Nagusia

Manuel Fraga Iribarne, gobernazio ministroaren agindualdian, Policía Armatuak 5 langile erahil zituzteneko 34. urteurrena betetzen denean, Gazte Abertzaleakek “pertsona hauek ez daitezela ahantziak geratu, Gasteizen gertatu ziren gertakari hauek ez daitezela garrantzi gabeko zerbait bezala geratu” eskatzen du.

Era berean, Eusko Alkartasunaren gazte erakundeak, “76ko greban parte hartu zuten langileek egin zuten bezala, ez dugula ahaztu behar guk ere eskubide eta askatasun aldarrikapen horien alde jarraitu behar dugula borrokatzen; greba eskubidea, errebindikazio laboralak eta biltzeko eskubideak gaur egun, San Franzisko elizan martxoaren 3 artan zeuden langileek egindako lanari esker ditugula” gogorarazi nahi du.

Gazte abertzaleaken ustetan, tamalgarria da 34 urte eta gero, oraindik ere justizia eta errekonozimendu baten esperoan egotea jendea, “tamalgarria da PP eta PSOEren gobernuek bat egin izatea pertsona hauek biktima bezala onartzeko aukeran, sarraski hauen errudunak sarituak izan diren bitartean”.

Eukal gizarteak orokorrean eta Gasteiztarrak partikularki, ez dute ahazten gure historian orban bat izan dena, eta ez da nekatuko, urtez urte egiten duen moduan, gaur egun ditugun eskubideen alde beraien bizitza eman zuten pertsona hauentzako justizia eskatzeaz, beraingatik eta beraiek bezalako pertsonengatik baitutugu eskubide hauek.

Horregatik, Gazte Abertzaleakek bat egiten du bihar Gasteizen deituak dauden mobilizazioetara, eta euskal gaztediari bertan parte hartzera dei egiten dio, eskubideak egunero eraikitzen direlako.

Giza eskubide guztien bermearen aldarrikapenean tinko jarraitu behar dugu. Alde batetik, nazioarte mailan onartuta dauden Banakako Eskubideak, genero, sexu joera, minusbaliotasun, ideologia, erlijio sineskerak edota jaioterriaren inguruko diskriminazioa erabat gaitzetsiz. Bestalde, Talde bezala ditugun Eskubideen alde lanean jarraitu behar dugu, kultur- nortasunaren babesa eta burujabetza eskubidearen aitortzea atal honen bi puntu garrantzitsuenak izanik. Gaur egun Frantzia eta Espainiako estatuek behin eta berriro ukatzen diguten bi idei izanik, guk geurean tinko eta zorrotz jarraitu behar dugu, burujabetasun praktika aurrera eraman arte.

Gure aberria Estatu izatearen eskubidea aldarrikatzeko bidean, bortizkeria gabeko mugimenduaren aldekoak gara, “desobedientzia zibilaren” bidea lanabesa izanik; are gehiago, azkeneko urteetan gure aldetik bide honetan sortu ditugun ekimenak gutxi direla aitortzen dugu, eta gure erakundetik hartutako lehenengo konpromisoa norabide horretan datza: gure eskubideen aldarrikapenean burubelarri jardutea, “desobedientzia zibilaren” inguruko jarduerak sustatuz eta pausoz pauso euskal gizartean “lo” dauden eragile nahiz pertsonak esnatu, hasieran aipatu dugun helburuaren lorpenean parte har dezaten.

Demokraziaren ezartze eskasa –birtuala- Euskal Herrian tamalez, urteetan pairatu dugun egoera izan da (kontutan harturik, bi estatuen arteko zatiketa erabat desitxuratzen duela Euskal Herriko arazoa osotasun batean hartzea eta aitzakia bezala balio dietela zenbaiti lurraldetasuna 7tik 3ra txikitzeko). Komunikabideen itxiera,manifestazioen debekua, zuzenbide-ikuspegitik justifikazio eskasa dituzten atxiloketa prebentiboak, torturak, etab. demokraziaren ezartze faltsuaren adibide garbiak dira. Beraz, gazte talde bezala dugun betebeharra Zuzenbidezko Estatuaren ezartze errealaren aldarrikapen jarraitua izan behar da. Egoeraren jabe bagara, gaur egun gizarte bezala bizi dugun geldialdia, herri bezala ditugun eskubideen alde modu sutsu, baikor eta bateratu batean lanean jarraitzearekin amaituko da.

PSEk eta PPk pairaezin iruditzen zaizkigun estortsio ekonomikoa eta disoluzio mehatxuekin, erakunde barneko giroa Estatu Kolpe baten bidez zapuztu nahi dute, urteetan euskal erakunde askorentzat beste modu batean lortu ezin genezakeen bilgunea izan dena.

Moral bikoitzarekin oso ondo jolasten dakiten aipatu ditudan bi alderdiek, Euskadiko Gazte Kontseilua deslegitimatzeko prozesua hasi dute eta horrela, haien doktrina espainolista ezartzeko sortu berri duten Gazteen Institutua justifikatzeko bidea erabat garbitu dute, azkeneko 30 urte hauetan egin den lan guztia baztertuz. Lópezen gobernuak sorkuntza berria indartu nahian, EGKk Justizi Soziala eta Oinarrizko Askatasun Eskubideak ezartzeko eta garatzeko behar dituen baliabideak kenduko baliote, Surrealismotik urrun ez gabiltzala pentsatuko nuke.

Parlamentuko hainbat bozeramaileek EGKk, nahiz talde hori osatzen dugun beste erakundeek, gizarteari egin dizkiogun ekarpenei buruz zituzten dudak onartezinak iruditzen zaizkigu; eta ari honetatik ere, Eusko Alkartasunako legebiltzarkidea den Jesus Mari Larrazabali EGKko autonomiaren alde eta bere hastapenetatik politika, ekonomia, gizarte eta kultura esparruetan gazteen parte-hartzean ezinbesteko paperaren inguruan egin duen defentsa eskertu nahiko genioke.

Argi gelditu da PPk eta PSEk ez dutela barneratu herri honetako gutxiengo baten errepresentazioa direla, espainiar nazionalismoaren gutxiengoa hain zuzen ere, eta horrek ez duela Alderdi Legerik ere aldatuko hautestontzietatik at. Gazte Abertzaleaketik oroitarazi nahi dugu, bai EGKk eta baita gure

erakundeak ere, une oro Giza Eskubide guztien defentsan jardun dugula, eta ez dugula atzera egin edozein bortizkeri mota salatzeko momentuan; beste batzuk ordea, espainiar Estatuak praktikan jartzen duen bortizkeriaren aurrean mutu gelditzearekin ez dute aski eta ez dute lotsarik izan odolez zikindutako diktadura garaiak goresten dituzten alderdikideak izatean, edota alderdien arteko bateratze horretan egotean. Alderdi unionistek –PP, PSOE eta UPyD- guri moraltasun klaserik emateko ez direla aproposenak argi dugu.

Zentzu honetan berriz ere azpimarratu nahiko nuke Nuevas Generaciones eta Juventudes Socialistasek egin ez duten moduan, EGKk herri honetan jazotako bortizkeri momentu oro salatu dituela.

Horrez gain, benetan larria iruditzen zaigu bere burua demokratatzat duen Legebiltzarkide batek Demokraziaren sistema dudan jartzea, gehiengoa bere alde azaltzen ez denean. Ironikoa iruditzen zaigu, egunero Demokraziataz hitzegiten ari diren pertsona batzuk, ze modutan botuen balioa gutxiesten duten gehiengoaren isla izatea asmatzea ote den galdetuz .

Ezin dugu ahantzi, ezer probatu ezean denok errugabeak garela, eta aurreko astean Legebiltzarrean garatu zen eztabaida lotsagarriak argi utzi zuen hainbat legebiltzarkideek, Demokraziaren aitzindaritzat dutenak euren buruak, “errugabetasun- presuntzio” hitz juridikoaren inguruan erabateko ez jakintasuna dutela. EGKk bere momentuan egin zuen moduan, bereizi gabeko prebentzio-espetxeratze justifika ezinak eta froga juridikorik gabe preso askori ezartzen zaien inkomunikazioa ezin ditugu salatu gabe utzi, hauek baitira “erruduntasun- presuntzio” hitza indartzen dituztenak.

Lópezek argi utzi du ez dela gai gure herriko aniztasuna onartzeko, egungo gehiengoa ulertzeko zailtasunak dituela, eta beraz, gure gizarteko eta bereziki gazteen beharrak eta grinak antzemateko eta berezkoak sentitzeko mekanismorik ez duela. Zentzu honetan, Gazte Abertzaleakek EGK hobetzeko buru- belarri jardungo du, ahalik eta aniztasun gehien mantenduz eta gaur arte egin duen bezala, Askatasun Adierazpena eta Giza Eskubide guztien defentsan jarrai dezan. Beraz, Euskal Herriko gazte erakundeen artean dauden zubiak zapuzteko saialdien aurrean, ez gara geldituko, eta EGK López eta bere taldearen txotxongilo batean bihurtu ez dadin, ez dugu atzera pausorik egingo eta etenik gabeko salaketan jarraituko dugu.

Eusko Alkartasunaren (EA) gazte erakundeak , Gazte Abertzaleakek (GA), gaur goizean bere poztasuna adierazi du Gasteiz eta Kastejoi arteko Goi-tentsioko linearen inguruan antolaturiko kontsulten emaitzengatik. Gazte Abertzaleakek herritarren parte hartzea azpimarratu du, horri esker entzun baita gizartearen ahotsa.

Gasteiz eta Kastejoi lotuko dituen goi-tentsioko lineak Lantarongoko zentral elektrikoa eta Kastejoien dagoeneko existitzen diren eta proiektaturik dauden zentral elektrikoak zein Nafarroako parke eolikoak lotuko ditu. Halere, Red Eléctrica Española-ren egitasmotan beste pieza bat besterik ez da, izan ere, azpiegitura honek Araban eta Nafarroan sorturiko energia elektrikoa penintsularen erdialdera eta Mediterraneoko erkidegoetara eramateko egina dago, lanen helburua Euskal Herritik ehundaka kilometrotan kokatzen delarik.

Gazte Abertzaleakentzat, Lizarraldean eta Arabako Mendialdean obra honek sortuko lituzkeen ingurugiro-kalteak onartezinak dira. Lurralde arabarrean 8 landare espezie daude galtzorian edota mehatxupean, eta Nafarroan, berriz, 11 dira mehatxatutako espezieak. Gainera, zonalde hauetan 18 animali espezie babestu bizi dira.

Azpiegitura honen eraikuntzak ez dio inongo onurarik ekarriko goi-tentsioak zeharkatuko dituen herriei. Gazte Abertzaleaken aburuz, Goi-tentsioko linea elektrikoaren ezaugarriek pasako den herri arabar eta nafarrei azpiegituratik onurarik jasotzea galarazten die, ezinezkoa izango baita konexioa bere boltaje altuarengatik.

“Esandako guztiari obra honek inguruko herriei eragingo liekeen kalte ekonomikoak gehitu behar zaizkio. Azpiegitura honekin dagoeneko eskasak diren nekazal lurrak murriztuko dira eta gainera, linea elektrikoa guztiz bateraezina da bailaran ezarri nahi den turismo jasangarriaren ereduarekin” adierazi dute Gazte Abertzaleaketik

Eusko Alkartasunaren gazte erakundeak abagunea aprobetxatu du PSOEri “herritarren ahotsa entzun dezan” eskatzeko, eta herriari “onurarik ekarriko ez dion proiektuak defendatzeari utz dezan”.

Gazte Abertzaleaken aburuz, “orain arte Foru Aldundiak gazteentzat zuzendu dituen jarduerak inposaketetan oinarritu egin dira”, eta Foru Aldundiko gazte saileko arduradunei jarrera eta egiteko moduen “premiazkoa” deritzon aldaketa eskatzen dio. Gazte Abertzakek Foru Aldundiko arduradunei Gipuzkoako gazteen ahotsa entzuteko garaia heldu zaiela uste du, eta behingoagatik lurraldeko gazteek dituzten beharrak modu egoki batean erantzunak izan daitezen.

Azken aste hauetan ‘Gaztemaniak!’ programaren jarraipenaren inguruan sortu den polemikak argi utzi du Gipuzkoako Foru Aldundiak duen lan egiteko era. “Gazteen interes eta beharrei modu telematikoan erantzun izateagatik, momentu honetan erakunde publiko eta gazteen arteko banaketa handiegia da” azpimarratu du Gazte Abertzaleakek.

Gazte Abertzaleakek gazte politikek modu parte-hartzailean landuak eta “gazteek eta gazteentzako” eginak egoteak ezinbestekotzat jotzen du, honetarako Gipuzkoako Foru Aldundiak elkarrizketarako jarrera baikorra azalduz, gazteen beharrak zeintzuk diren era errealean jakiteko. “Gaur egun daramaten jarrera sostengaezina da; gazteei zuzenduta dauden politikak kaleetatik irten daitezen ordua iritsi da, gazteek parte har dezaten haien lanketan, Foru Aldundiko bulegoetatik urrun” aldarrikatu du Gazte Abertzaleakek.

Gaur Gazte Abertzaleakek Gaztemaniak programari ematen dion babesa aldarrikatu du, azken 16 urte hauetan tokiko talde ugari ezagutaraztea eman baititu eta Gipuzkoako gazteei musika gerturatzeko balio izan baitu. Erakunde independentistaren aburuz “Gaztemaniak beste modu batera inork ezagutuko ez lituzkeen taldeen erakustoki ederra izan da, beraz, programa honen aurrekontuaren murrizketak lurralde honetan garatzen ari den musika- egoera erabat zapuztuko luke”.

Gazte Abertzaleakeko Gai Sektorialetako Idazkaria den Haritz Perezek, Gaztemaniakeko esperientzia bermatu du, bere iritziz “sortu berri diren musika talde askok, tendentzia desberdinetakoak, berritzeko, lanean jarduteko eta bere musika hedatzeko aukera eman dielako, Gipuzkoako lurraldean dinamika aberasgarria sustatuz”. “Berez, Foru Aldundiko 2010rako aurkeztutako aurrekontua Gipuzkoako gazteek ditugun arazoei aurre egiteko murritza bazen, Gaztemaniak bezalako programetako aurrekontuen mozketak “Gazte Abertzaleakentzat onartezinak dira” azpimarratu du Haritz Perezek.

Gazte Abertzaleakek Hamaikabateko (H1) transfugak eta bereziki Gizarte Politikako diputatua den Maite Etxaniz Gaztemaniak bizitzen ari den zailtasun honen erantzuletzat hartzen ditu. “Hamaikabateko transfugek gazte politiketan eskubiko ideien praktikak aurrera eramaten dituzte, Eusko Alkartasunak azkeneko Foru Aldundietako hauteskundeetan lortu zuen errepresentaziotik”. Egoera honen aurrean, Gazte Abertzaleak Eusko Alkartasunako gazte erakundea den bezala, Foru Aldundiko gazte sailean Hamaikabateko transfugen erreprensentazioak “ez duela Gazte Abertzaleakek 20 urte hauetan lanean jardun duen proiektua aurrera ateratzen eta Eusko Alkartasunak gazteekin betidanik izan duen konpromezua ez duela betetzen, are gehiago, urteetan landu duen politika aldrebesten du” argitu du.

Azkenik, Eusko Alkartasunako gazte erakundeak “Gaztemaniak! Salba dezagun” ekimenari bere babes guztia ematen dio eta lurraldeko osoko, nahiz gai honen inguruko kezka duten gazte guztiei, blogean dagoen manifestuari bere atxikipena ematea animatzen die.

Gazte Abertzaleakeko Batzorde Eragileak gaur irmoki errefusatu du Etxerat larunbat honetan Bilbon antolatutako manifestazioaren debekua, Auzitegi Nazionalak hartutako erabakiak adierazpen askatasuna determinatzen duelako. Era berean, gazte erakundeak oroitarazi nahi izan du Etxeratek antolatutako martxak eragile desberdinen babesa zuela: kirolariak, elkarteak, alderdi politikoak eta euskal gehiengo sindikala, besteak beste.

Gazte Abertzaleakek, ordu batzuk lehenago manifestaziora atxikitzeko pausoa eman zuelarik, Auzitegi Nazionalak demokraziak bermatu behar dituen eskubideen eta askatasunaren urraketa sakonena egin du debekatze honekin.

Gazte Abertzaleakek dispertsioaren amaiera eta presondegietan giza eskubideak bermatzeko aldarrikapena zilegitzat, legezkotzat eta demokratikotzat hartzen du, beraz, debekuaren ezeztapena irmoki eskatzen du.

Gazte Abertzaleakek ‘Bizigune’-ren barnean egindako aldaketak arbuiatu ditu, bere aburuz alokairuaren sustapena oztopatzen dutelako. Erakundeak Bizigune programaren bitartez etxebizitzen jabeei ordaintzen zaien gehienekoa 600 eurotara jaitsi izana zentsuratu du. Gazte Abertzaleaken aburuz, “neurri honek Bizigune programaren barnean gestionantzen diren etxebizitzen murrizpena dakar, eta ondorioz etxebizitza gutxiago egongo dira alokairuan eskaintzeko.” Gazte erakundeak adierazi du gazteen kolektiboa dela kaltetuenetarikoa, izan ere alokairu sozialean dauden pisuen kopurua gutxitzean emantzipatzeko aukerak murrizten dira.

Bestalde, Gazte Abertzaleakek merkatu librean neurri honek izan ditzakeen ondorioetaz ohartarazi du. “Eskaintza eta eskariarengatik mugitzen den merkatu batean, zenbat eta etxebizitza sozial gutxiago, orduan eta garestiago izango dira merkatu librekoak” azpimarratu dute Eusko Alkartasunako gazteek. Gazte erakunde independentistak adierazi du “hau ez zela momentua” horrelako erabaki bat hartzeko, izan ere, “justu orain, krisiaren ondorioz, ez dira etxebizitzak saltzen eta errazagoa da orain arte zalantzan zeuden jabeak alokairu politikara gerturatzea”.

Azkenik, Gazte Abertzaleakek adierazi du “ Iñaki Arriola sailburuaren adierazpenak ez dira batere eragingarriak etxebizitza arloan”, are gehiago Euskal Autonomia Erkidegoan 75.000 eta 80.000 etxebizitza berriak eraikitzeko beharra dagoela publikoki adierazi duenean. “Arriolak argitu beharko du etxebizitza hutsen merkatua mugiarazteko alokairu sozialarengatik apustua egiten duen  ala Euskal Herriko zati handi bat porlanez betetzen ari diren etxegileekin bat egiten duen.